潮州煎蠔餅

以前細個最鐘意亞媽煎蠔餅, 因為果餐就唔會煮飯唔洗食飯, 我哋會輪住等, 亞媽一路煎我哋一路食, 一人一大塊自己食, 唔洗爭, 多蔥多芫茜多蠔仔多雞蛋, 妤好味.
果時的蕃薯粉來自家鄉親人自家磨好乾淨的, 記得市售的蕃薯粉都好污濁, 開水後灰灰黑黑又多雜質, 唔敢食成包掉左, 無得食好失望架, 依家一般質素已經唔太差. 

去打冷店食的潮州煎蠔餅, 基本會用對蕃薯粉, 但多數都係半煎炸, 肥淋淋, 幾好食都變唔好食. 試過有店舖竟然用麵粉來開糊, 夠晒馬虎.
台灣蚵仔煎較像樣, 都會用地瓜粉, 而且用平底鑊煎, 唔太油膩, 可惜最後加的橙啡色醬汁好核突好難食.

買左半斤蠔仔整阿宗麵線, 剩餘的蠔仔整潮州煎蠔餅,  今年在韓國買左一包蕃薯粉W3,290 回來試, 質數都好好.

蕃薯粉加水開成槳, 加入多蔥多芫茜

粉槳好快沉底, 每次要攪拌均勻快手落平底鑊, 除即加入蠔仔
(亦可以將蠔仔先加入粉槳中一併落平底鑊)

厚槳薄槳好隨意, 見粉槳將近完全轉透明, 加入雞蛋汁

返轉煎香煎熟蠔仔

上碟加魚露及胡椒粉, 要襯熱食. 

都係自家潮州煎蠔餅最啱口味, 兒時回憶返晒黎.    

同場加映:
這個老媽給我的蕃薯粉, 好珍貴, 制作過程要反覆浸漂多次, 然後涼乾, 時間長功夫多, 聴完唔會即時有衝動想整, 有機會都想試下. 

蕃薯粒好耐放, 臨時想食的話, 無蠔仔都唔緊要, 至少都要有蔥粒雞蛋 

一樣食之前加魚露及胡椒粉 

自家蕃薯粉煎起黎好晶瑩通透