化療第一針~第3-7天 升白針

17/9/2013 化療第一針~第3天 
今日只有Emend止嘔葯, 早上開始一連5日返醫院打升白針, 因為打Taxotere針葯其中一個副作用會使白血球嚴重下降, 容易受外間感染, 所以要打針提升白血球, 而骨髓因被迫額外做白血球, 過程會產生骨痛感覺, 到底有幾痛因人而異, 希望唔好太強烈; 記得之前護士話升白針可以打肚皮或手臂, 而打肚皮會較為唔痛, 但今日這位護士並沒有給我選擇, 就在手臂打了, 因為肚腩傷口太長唔適合嗎? 我沒有問. 打針感覺有些少痛, 這點點痛楚真係小兒科, 絶對可以忍受. 
回家已感覺明顯週身茅力, 渴睡而且無精神加上無胃口, 全日除了吃及上厠所排毒外, 都要爬上床睡覺, 免疫力下降, 半夜開始喉嚨痛了.

18/9/2013 化療第一針~第4天

醫生開左需要時才服的普通止嘔葯, 雖然未有作悶作嘔, 決定食多一日止嘔葯, 以防萬一.  
打升白針第二日, 全日昏昏欲睡, 週身無力而且骨頭開始酸酸痛, 腳踝、腳背、小腿、菠蘿蓋、尾龍骨、筋骨、肩膊、後頸........., 好彩各部位並唔係同一時間酸痛, 而係好飄忽咁始起彼落; 持續痛的只有喉嚨, 半夜更要起身找喉糖含住至訓得着.

19/9/2013 化療第一針~第5天
今日中秋節, 話說今年月光份外明亮, 都有食一小角月餅應應節.
如常到醫院打第三支升白針, 仍然週身骨頭酸酸痛及喉嚨痛, 無神無氣無力又無胃口, 連日進食唔多, 奇怪竟然又無肚餓感覺; 大姐煲了無花果蘋果雪梨湯, 加上每餐刷牙後改用鹽水潄口, 夜間喉嚨痛稍為舒緩了, 祈求不要口腔潰爛, 亦要避免受傷, 多休息多睡眠, 增強底坑力. 

21/9/2013 化療第一針~第7天
中秋假期及星期六, 這2日由葉先生陪我打第四、五支升白針, 今早打完返回住所樓下突然好想食燒賣, 見荼樓食客唔多, 快閃飲早茶, 巧內茅吃燒賣, 巧開心.
但係, 由下午開始週身骨頭酸痛感增加, 累積5支升白針後終於發揮威力, 半夜強烈痛到屎屎下, 尤其是尾龍骨位置, 典來典去訓唔返,  想起早上還輕鬆回答護士有點習慣週身骨頭酸酸痛, 想東想西, 想到萬一明早抽血白血球唔合格, 要多打2支升白針, 如何受得了? 眼淚不其然就流下來, 不過, 好快就同自己講, 唔咸得唔輸得, 癌細胞我要同你屎過!
夜深人靜容易變得軟弱, 發洩過負能量後, 才想起有醫生開的止痛葯可以食; 葯力未發揮, 開手機睇場Running Man開心下, 睇完肚餓, 又爬起身食件香蕉蛋糕, 之後感覺骨頭開始無咁痛, 快要天光才重回夢鄉.