"極"鐵鑊

一鑊接一鑊 ^^
如果, 如果買"極"鐵鑊先
就一定一定唔會買WMF Profi 不鏽鋼煎pan
咁就可以慳返EUR63了

10月中收到消息
日本樂天市場有免3kg運費優惠
原先諗住去開沖繩先買嘅"極"
依家唔洗自己帶返嚟, 是但啦
拿拿聲上網逛下參與活動嘅商店
揾到一間有啱尺碼而又有貨的
28cm炒鑊 Yen5,490 約ＨKD430
哈! 趕及20號限期前落單
只係幾日運送時間
"極"鐵鑊安全到港送上門了

官網見鐵鑊有2個系列 
而2個系列中各款鐵鑊鑊身都係一樣質地
分別只差在手柄度
"極"系列, 深啡色手柄
"極Roots"系列, 淺木色手柄
雖然淺色木手柄較靚仔
但, 深啡色手柄感覺踏實又襟污糟, 啱我

開鑊方面好簡單
用水清洗內內外外
中火徹底烘乾水份後
加入大約1/3鍋油份量小火燒潤5分鐘
我並無跟足說明書
只係用小量油加熱後慢慢遙混全隻鑊
熄火稍為降温後用廚房紙抺走多餘油份
官網有中文說明書

第一次試鑊係"一鑊過碟頭飯"
煎蛋

返面都幾靚 (覺得比WMF不鏽鋼煎pan更靚)

跟手炒菜心
接住炒蔥粒糙米飯

"一鑊過碟頭飯" 攪掂

三文魚蘑菇炒飯

無痴底唔錯

煎菠菜蛋餅
小小痴底, 唔能夠完整反面, 失敗咗
好樣衰無心機影相

煎韮王蛋餅

可以完美反身了

仲可以放心用鑊鏟切埋件至上碟

跟手原鑊炒埋蕃薯葉

配蘿蔔秋葵水雲麵豉湯

煎豆腐

無問題 (WMF煎pan痴到不得了,想起就怕,完全唔掂啊)

煎急凍斑塊, 第1轉OK 

煎埋第2轉都OK

跟手煮熱粟米忌廉, 斑塊回鑊加蛋白

粟米斑塊

煎三文魚

唔散, 滿意 (WMF煎panOK)

跟手煎羊肩扒

Good呀 (WMF煎pan都OK)

煎雞扒, 第一次自己起骨, 無想像咁難

薑汁香草雞扒

雖然係無激素雞,  不過無食到雞皮

仲有嘅就係蘿蔔糕

合格 (WMF煎pan就仍未成功)

反身時真係有DD緊張架 
雖然反面後有些少痴, 不過可以用鑊鏟輕輕推掉

清洗方面
說明書話不宜用洗潔精, 用後一定要重新開鑊燒潤
我只係以水+神奇的"絲瓜絡"洗刷已經夠乾淨
"絲瓜絡"實在太好用
平常煮食用橄欖油可以輕易洗甩
就連肉類油脂都一樣可以洗掉
洗完後, 油脂又唔會殘留响"絲瓜絡"
夠晒神奇夠晒環保
既然可以唔用化學野就唔好用喇

保養方面
每次清洗完小火完全烘乾水份
(只係最初幾次洗完烘乾後, 用廚紙上一層薄油)

依隻鑊要好高温煮食? 
我覺得又唔係喎
等過幾日支紅外線温度計到手會再測試下
平常熱鑊後會熄火等稍為降温才放油
油入鑊後並無出現油炆狀態
之後用中小火煮食都OK
跟本檔佢係易潔鑊咁使用
以我家嘅煮食習慣 
偶爾想煎下肉類.蘿蔔糕就要放多些少油量
暫時覺得好好用.好滿意

而且佢真係:
極唔易生鏽, 極唔易刮花
極容易傳熱, 極容易清洗