重生

完成六次化療至今快到二個月, 手指麻痺的感覺仍在, 沒有之前般強烈, 好像有些微減退, 但熱水沖涼時仍然感到又脹又痺又痛; 腳趾麻痺亦依舊, 而腳板底仍然感覺異常, 站立時就像有個一元大小的硬幣貼在腳底, 夠晒奇怪, 夠晒唔舒服, 有時幻想腳底果塊係金幣感覺會良好d; 化療後期開始接受針灸, 希望能夠舒緩手腳麻痺, 即使害怕針痛都絕對願意忍受, 每次拾幾針好似箭豬咁,  可惜, 做左6次針灸後要放棄, 因為化療完成後學習氣功, 師父認為針灸深入刺激經絡, 行氣活化細胞, 當然亦包括癌細胞, 所以唔建議針灸, 人手穴位按摩屬於淺層刺激, 柔按就無防咁話. 


頭髮開始重新生長出來了, 療程期間個甩毛樣, 同埋後期甩晒光禿禿個樣都唔想家人見到, 既恐怖又肉酸, 怕佢地傷心難過, 葉先生時常話外觀變得如何如何都不是重點, 最緊要我覺得舒服自在, 而我唔想佢地留底唔好嘅回憶, 破壞形象. 依家新生出來, 心情截然不同唔會介意, 頭髮約有半吋長, 大姐每次見面都會拉起帽邊觀看, 然後替我高興, 有時我會跟手將帽子拿掉, 等佢睇過清楚, 雖然十分稀疏但柔軟非常, 原來唔同部位生長速度都唔同, 後尾枕最先, 頭頂較慢尤其是前端額角M字位, 初時遲遲未見生長出來, 真係嚇屎我.

終於可以退休了, 離開工作11年多的公司, 都好唔捨得, 好在得到公司體諒, 唔洗趕住返去執包袱.  
家庭主婦真係唔易做, 多多時間都唔夠用咁, 好鬼屎忙:  晨操氣功、休息、買餸、煮飯、煲湯、睇書、家務清潔、洗碗、洗衫、追韓劇、午睡休息、上網、寫網誌、午間氣功、穴位按摩、晚課氣功、整麵包、大排毒、小排毒、物理治療、浸花膠、發海參、炆冬菇、種豆芽菜、養酵素、whatsapp報告、發呆............
間唔中覆診、遲下要睇中醫調理, 仲忙個以前返工.

新頭髮, 新生命, 新態度, 新生活.