WMF profi 不鏽鋼煎pan

瑞士旅遊回來, 遊記未寫, 先出購物^^

一直想買個無塗層嘅安全煎鑊
心議法國"De buyer"鐵鑊, 去上海街睇過, 實在太重
或者日本"極"鐵鑊, 想話下次去沖繩就帶回家
拖拖拉拉, 諗下又等下...... 

估唔到
今次瑞士之旅無意中帶回生平第一隻的不鏽鋼煎pan
WMF profi 系列28cm平底煎pan
原價EUR69.95 退稅後EUR63
臨時計劃過境德國買的, 重點係德國製 

第一次試鑊, 煎三文魚
熱鑊後調底至中小火, 加油

返轉無甩皮甩骨, 完全唔痴底, 正呀(暗自讚賞咗一下,好技術)

魚皮仲卜卜脆

上碟外觀仍然完整, 拌洋蔥蘑菇汁, 藜麥飯

配青豆菠菜湯

用另一件順便帶回家的Philips 手提攪拌機打蓉
原價EUR69.99 減價EUR49.99 退稅後EUR45

煮好直接打成濃湯好方便

隔日測試煎雞蛋

返轉煎都無問題, 靠得住(事半功倍, 又再沾沾自喜)

跟手炒幾下芥蘭莖

加埋藜麥冷飯又炒幾下

最後炒芥蘭葉

順利完成我的一鑊過碟頭飯午餐

上網見人家煎糕好似溜冰場咁滑來滑去
之後滿心歡喜咁整咗瑤柱冬菇蘿蔔糕試下佢

返一次痴一次, 蘿蔔糕越煎越薄身
好彩只係放咗2塊試煎

蘿蔔糕太軟身? 爐火唔夠? 油量過小? 技術唔好?
突然間有一堆疑問, 無晒心機
思前想後, 通通都係問題都有關係
大大既錯敗感後, 浸洗乾淨
調底爐火增加油量再次試煎

都係痴痴地呀, 隻鑊
免強煎好的2塊
煎的實在比蒸的美味得多

熄火後, 餘温仍然強勁, 痴底物會繼續燒焦
不鏽鋼另一好處係浸熱水就好容易清洗

昨晚煎蔥花蛋無礙, 重拾返小小信心