首個五週年

每年將近年檢時候自自然然會緊張起來
會花特別多時間上網流連"戰友會"
今年嘅心情就加倍緊張
因為係首個平安指標五週年
查實一般復發高危期係第二、三年
依個始終只係一個統計上嘅參考數字
五年內或者過後再來揾你的亦大有個案
所以去到邊個階段亦未能夠鬆懈掉以輕心


得知患病後有無好似其他戰友咁草擬"心願清單"?
我無! 個人覺得無必要
我唔想有任何未完成嘅心理壓力
亦唔想令到身邊關心你嘅人有無形負擔感
我只想活得自在、過得輕鬆、平安

完成治療至今仍有手指痛、手腕無力、腳水腫...
講起腳水腫最嚴重最慘情係當年治療期間
每次踎低即刻就會後悔
因為有壓迫力所以會劇烈脹痛
企起身血液回流之時更加痛到你瓜瓜叫
而依家只係普通腳水腫
每日大約中午過後兩條肉腿都會大一個圈
企耐會腫d、坐耐會腫dd、出外用餐鹽份高就更腫ddd
已經習慣咗並無造成好大困擾

平時早操完都有做下簡單拉筋
往年見流行日本嘅"劈腿伸展操"
強調4星期練習就可以劈腿
好強好神奇
佢嘅8大功效吸引咗硬骨頭嘅我注意
尤其是通淋巴消水腫、血液循環預防動脈硬化
之後開始嘗試伸展操練習
身體柔軟度係好咗
但係經過無數個4星期後
效果一直定留响第三週嘅狀態
因為我吔吔嗚只係選擇做幾個動作
睇尼要認真加倍努力
希望大字碼一字碼指日可待

睡眠方面除咗中葯調理配合
每晚會盤腿混合 "伸展操" 加 "睡眠瑜伽"
練習中途已經好有睡意
依家睡眠質數的確有改善

總算有驚無險跨越第一個五年關口
都值得高興一下 ^^
多得葉先生支持, 讓我安心辭職養病
多得葉先生努力工作, 換來我的無憂生活
亦感謝大姊為慶祝我的首個五週年而減少口福嘅重大決定

Can we eat to starve cancer? (我們能藉著吃來餓死癌症嗎？)
久不久就會重温一次Dr.William Li 嘅演講視頻
肉容提到每人身體裡有隱藏性癌細胞
而產生癌症與微血管增生有好密切嘅關聯
當癌細胞突變後會刺激血管生長
血管會將氧氣及養份帶到腫瘤
繼而迅速生長四維擴散
一發不可以收拾
所以正在研究有咩食物抑制血管增新
從而達到抗癌效果...

以下係演講提及有效嘅食物及飲料
9成9都係大眾化食材
日常市面可以購買得到
(字幕遮住係香港唔常有的Artichokes 朝鮮薊)

希望下次報平安係第二個五週年 ^^