化療第二針~第15-21天

20/10/2013 化療第二針~第15天
早上抽血, 下午見醫生覆診, 驗血報告白血球、肝腎功能正常, 以為一切順利, 點知, 醫生話由於上次落葯出現面珠發紅發熱對葯物過敏情況, 雖然休息後可以再次接收, 但身體細胞已自動起保衛對抗作用, 對這外來葯物作出攻擊, 下次敏感情況可能更大更嚴重, 會休克甚至死亡, 所以建議轉另一隻葯Paclitaxel, 一隻現時政府醫院採用的葯物; 真係十萬個千萬個唔願意, 因為我知道
這葯物副作用更多, 白血球血小板減少更多, 政府醫院也不會打升白針, 只靠病人自求多福, 直到回升合格才會繼續療程, 最令我擔心害怕的是會傷害到末梢神經, 引致手腳麻痺, 需停藥數個月後才慢慢緩解, 但是, 約有10%機會受損了的神經無法復原, 我貢黑仔, 就係主要為左避免神經受損, 即使政府醫院對這病用葯是免費, 亦情願付款到私家醫院接受治療; 與醫生為轉葯問題討論接近1小時, 葉先生說萬一出意外如何了? 係, 葉先生如何了? 家人如何了? 剛剛至執回半條人命, 我唔可以咁自私, 唔可以令手術及化療變得無意義, 因為化療目的係賣保險清除手術看不見的殘餘癌細胞, 係續命而唔係博命, 唯有簽下轉葯同意書, 先對付殘餘癌細胞, 後再醫治手腳麻痺問題.    

手術至今2個多月了, 還未敢將得病消息告知老爸老媽! 家中部份成員亦未通知, 保密功夫做得好, 全靠與兩老同住的大姐幫助. 大姐既要打理自家日常起居, 又要長途跋涉到來照顧相伴, 更要對老兩隱瞞真相, 辛苦了. 到底真相要對兩老講還是唔要講? 何時講? 如何講? 講多少? 要考慮的實在太多, 又想到會復發嗎? 會否白頭送黑頭? 唔敢想, 想遠了, 想多了, 想得太多了, 煩惱真的很煩惱.
無法回娘家的日子, 靠平時多打電話回去請安問好及用唔同藉口瞞天過海, 上月兩老生日飯臨時詐感冒無出席, 為免引起懷疑, 及襯住有精神而且身體仍然肥豬大隻, 商量後安排在姐夫生日聚餐, 由姐夫車兩老到來大家見見面.  
今天覆診後回家準備晚餐, 有菠蘿炒飯、洋蔥薯蓉、車厘茄沙律菜、生日蛋糕, 其餘外賣及由大姐負責購買.
這味菠蘿炒飯可以講失敗, 因為食譜中需要咖哩粉, 購買冠益出品並無預先試味, 咖哩粉味香但勁辣, 完全失去菠蘿炒飯特色. 

21/10/2013 化療第二針~第16天
今天開始吃維他命B6, 希望對減輕手腳麻痺會有一些幫助. 

26/10/2013 化療第二針~第21天
第二針療程唔算太辛苦的渡過了, 手術後失去的體重早已追回來, 可能堅持每天飲用oral impact營養速癒素, 身體並無消瘦, 平時唔照鏡子的時候還會忘記自己是癌症病人, 但, 每晚洗頭沖涼看見肚皮上接近10吋長的傷口時, 總會提醒你的. 
又過一關了, 加油啊, 葉太!