杯弓蛇影

完成治療後身體機能或多或小會有變化


罹癌至今每當察覺有些微小毛病就會胡思亂想

然後上網揾資料自己做下醫生
試過手指、大腿痛以為走咗去骨
肚腩扯住痛就以為走咗去大腸
最驚嚇一次應該係牙肉痛咗幾日
好奇張大個口照鏡睇下咩情況
嘩!! 牙肉週邊係紅噹噹嘅鮮血色
心肝仔即時博博跳
以為走咗去口腔
結果用鹽水漱口幾日後無事

早前抗癌戰友會一位師兄分享治癒10年心得
大致話作息要定時
日常運動之餘最緊要開懷活、開心吃
認為樣樣顧忌嘅生活就會亳無樂趣
每日快樂"吃"對佢黎講尤其重要
除咗儘量避免罐頭、加工食物之外
其餘通通都任意"吃".....
有好多戰友留言羡慕師兄嘅生活模式
其實唔同人的確有唔同效果
就如我的其中一個後遺症"骨質疏鬆"咁
兩位跟我相同病証街坊戰友嘅骨頭就完全無問題

骨質疏鬆方面
估唔到近2年有鈣片補充仍未能控制骨質流失速度
護士話我之前嘅簡單運動唔能夠有效地刺激骨頭
應該做"負重運動"輔助至可以話比骨頭知吸收鈣質
希望有機會延緩速度甚至逆轉密度
更加估唔到12月6日早朝照骨途中唔小心跌倒
若果知道骨頭比阿婆仲差可能唔會响列車加速時讓坐
若果果刻無讓坐應該唔會失重心側身跌坐地下
當時隨即有4、5隻手扶返起身
成個大冬瓜落地都幾瘀架
咁啱撞傷位置正正係要照骨檢查果邊身體
影像結果無異只係瘀瘀青青小意思

近月依兩位街坊戰友相繼再度復發
得知消息時心底裡好難過
一位年紀比我大
下個月要再次經歷既可怕又痛苦治療
另一位年紀比我輕
前年基因測試成功配對得到針對性藥物
每月要自費用藥控制病情
療程無了期之餘亦係無底深潭
最令人氣餒係以為可以換來和平共處
無奈發現追蹤指數開始異常
希望希望希望
兩位要有堅定嘅信念
一切都順利、平安

體會到所有所有都因人而異
食物如是、藥物如是、治療也如是
佢得唔代表你得
你得亦唔代表我得

記憶力大不如前
可能經過大大小小麻醉手術
再加上一整個年紀大
久不久要提醒下自己小心謹慎
好好珍惜得來不易嘅健康